Allar færslur eftir aflid

Tímapantanir

Borið hefur á því að ef einstaklingar eru að panta tíma í viðtöl hér í gegnum heimasíðuna berast beiðnirnar ekki til okkar í Aflið. Verið er að vinna í því að laga þetta og eins að uppfæra heimasíðuna okkar. Við bendum á að betra er að panta viðtal í gegnum facebook síðuna okkar Aflið, hringja í okkar í síma: 461-5959 eða senda á e-mailið aflidakureyri@gmail.com

Styrktarsjóður ELKO færir Aflinu gjafir.

Styrktarsjóður ELKO færði í gær barnadeild Sjúkrahússins á Akureyri, Aflinu og Hetjunum nokkrar gjafir. Fulltrúar allra þriggja mættu í verslun ELKO og tóku við tækjum og tólum.

Aflið eru samtök gegn kynferðis- og heimilisofbeldi og Hetjurnar er félag langveikra og fatlaðra barna á Norðurlandi.

Haukur Hergeirsson verslunarstjóri ELKO segir styrktarsjóð fyrirtækisins árlega gefa ýmislegt til samtaka og stofnana eins og þeirra sem hann færði gjafirnar í gær. „Þannig vill fyrirtækið sýna í verki að slagorðið Það sem skiptir þig máli, skiptir okkur máli eru ekki bara orðin tóm.“

Hetjurnar fengu fartölvu, prentara og hátalara, Aflið kaffikönnu, samlokugrill og síma og barnadeild SAk tvær Nintendo switch leikjatölvur og tölvuleiki.

 

Aðalfundur Aflsins 2020

Aðalfundur Aflsins verður haldinn miðvikudaginn 3.júní n.k. kl. 16.30. Fundurinn verður haldin í húsnæði Zoontaklúbbs Akureyrar, Aðalstræti 54.

Á dagskrá eru hefðbundin aðalfundarstörf.

Framboð til stjórnar tilkynnist með tölvupósti á netfangið aflidakureyri@gmail.com eigi síðar en 2. júní.

Góðar heimsóknir í Kjördæmaviku

Nú er að ljúka kjördæmaviku sem þingmenn nýta til að fara út í kjördæmi sín og hitta kjósendur. Kristín Heba gjaldkeri samtakanna og Sigurbjörg verkefnastjóri eru búnar að hitta mikið af góðu fólki þessa vikuna,ræða framtíð Aflsins og hvernig best sé að tryggja samtökunum öruggan rekstrargrundvöll næstu árin. Við þökkum kærlega fyrir heimsóknir og spjall síðustu daga.

Fundur á Dalvík með Ásmundi Einari félags- og barnamálaráðherra ásamt þingmönnum Framsóknar

Albertína Elíasdóttir og Logi Einarsson þingmenn Samfylkingarinnar kíktu við í gott spjall.

Þingflokkur VG kíkti líka í kaffi til okkar og áttum við gott samtal við þingmenn flokksins þær Lilju Rafney Magnúsdóttur og Steinunni Þóru Árnadóttur.

Félags- og barnamálaráðherra semur við Aflið á Akureyri

Aflið á Akureyri, samtök gegn kynferðis- og heimilisofbeldi, fær átján milljóna króna framlag til að standa straum af starfsemi sinni, samkvæmt samningi sem Ásmundur Einar Daðason, félags- og barnamálaráðherra, og Sigurbjörg Harðardóttir, verkefnisstjóri Aflsins, undirrituðu um síðustu helgi. Samningurinn byggir á samþykkt fjárlaganefndar Alþingis og gildir til 31. desember 2020. Meginmarkmið samningsins er að styrkja Aflið til að standa straum af kostnaði starfseminnar, en hún felst meðal annars í ráðgjöf og stuðningi við þolendur kynferðis- og heimilisofbeldis, forvarnarfræðslu, faglegri ráðgjöf, handleiðslu ráðgjafa og þróunarstarfi.

„Mikill fjöldi fólks sækist eftir þjónustu Aflsins á ári hverju. Það er sorgleg staðreynd en jafn mikilvægt að tryggja að þolendur geti sótt stuðning og ráðgjöf við hæfi. Sömuleiðis að þeir þurfi ekki að fara um langan veg til að fá þjónustu. Samningurinn tryggir það,“ sagði Ásmundur Einar við undirritunina.

Elín Björg Ragnarsdóttir formaður stjórnar Aflsins og Ásmundur Einar Daðason Félags- og barnamálaráðherra við undirritun samningsins.

Elín Björg Ragnarsdóttir og Ásmundur Einar Daðason ásamt Líneik Önnu Sævarsdóttur þingmanni, Kristínu Hebu Gísladóttur gjaldkera Aflsins og Sigurbjörgu Harðardóttur verkefnastjóra og ráðgjafa Aflsins.