Allar færslur eftir aflid

Aflið á „Nordiske kvinner mot vold“ ráðstefnu

Fulltrúar frá Aflinu fjölmenntu á ráðstefnuna „Nordiske kvinner mot vold“ sem haldin var á Grand Hotel Reykjavík dagana 1.-3. september. Óhætt er að segja að ráðstefnan hafi verið vel heppnuð og komu starfsmenn Aflsins fróðari og tvíefldir til baka eftir að hafa hlýtt á fjölda kvenna flytja erindi og vera með vinnustofur þar sem áherslan var á raddir þolenda.

Það var mjög áhugavert að heyra af starfi samtaka og athvarfa á norðurlöndum og hvernig þau eru að nýta sér nýjustu tækni og samfélagsmiðla til að ná til fleiri einstaklinga sem þurfa á þjónustu þeirra að halda. Eins voru ávörp þolenda og umfjöllun um kröfur þeirra um að endurheimta sitt rými í samfélaginu mjög áhrifamikil.

Aflið þakkar starfsfólki Stígamóta og Kvennaathvarfsins fyrir góðar móttökur og fyrir skipulagningu ráðstefnunnar sem fór hnökralaust fram.

Aflið virkt á hátíðum sumarsins

Aflið hefur átt í góðu samstarfi við skipuleggjendur hátíða víða á Norður og Austurlandi síðustu ár og engin breyting varð á því þetta árið.

Aflið var með vaktir og viðveru á Bíladögum á Akureyri dagana 14.-17. júní. Starfsmenn Aflsins voru sýnilegir á helstu viðburðum og skemmtistöðum á Akureyri auk þess sem tjaldsvæði voru heimsótt. Starfsmenn Aflsins tóku þátt í undirbúningsfundum og skipulagi og áttu mjög gott samstarf við skipuleggjendur og aðra sem að Bíladögum komu. Viðvera og gönguvaktir Aflsins á Bíladögum og um verslunarmannahelgina eru hluti af skyldum Aflsins samkvæmt samstarfssamningi samtakanna við Akureyrarbæ.

Aflið var með vaktir og viðveru á Eistnaflugi á Neskaupstað dagana 5.-9. júlí að ósk skipuleggjenda og tóku starfsmenn Aflsins þátt í samráðsfundum á meðan á hátíðinni stóð. Starfsmenn Aflsins voru sýnilegir á tjaldsvæði og á tónleikum auk þess sem þeir voru á sólarhrings bakvakt meðan á hátíðinni stóð. Aflið hefur áður verið með viðveru á Eistnaflugi og átt í góðu samstarfi við hátíðina og er það okkar von að framhald verði á því.

Mærudagar voru haldnir á Húsavík dagana 27.-30. júlí og voru starfsmenn Aflsins með vaktir og viðveru á helstu viðburðum og skemmtistöðum á föstudegi og laugardegi auk þess sem þeir voru með símann á bakvakt allan sólarhringinn. Starfsmaður Aflsins var viðstaddur samráðsfundi á meðan á hátíðinni stóð og var samstarf og aðstaða eins og best verður á kosið og vonandi verður framhald á því næstu ár.

Líkt og á Bíladögum var Aflið með vaktir og viðveru á Einni með öllu um verslunarmannahelgina á Akureyri sem hluta af samstarfssamningi við Akureyrarbæ. Aflið tók þátt í undirbúningsfundi fyrir helgina og fékk aðstöðu í húsnæði Viðburðastofu Norðurlands. Skipulag vakta og viðveru var með svipuðum hætti og á Bíladögum þar sem starfsmenn Aflsins voru sýnilegir á helstu viðburðum, tjaldstæðum og skemmtistöðum bæjarins auk þess sem starfsmaður var á sólarhringsbakvakt alla helgina.

Aflið þakkar skipuleggjendum fyrir frábært samstarf og það traust sem okkur er sýnt.

Lions styrkir Aflið

Starfsemi Aflsins byggir á styrkjum og frjálsum framlögum. Aflið hefur í gegnum tíðina notið mikils stuðnings í nærsamfélaginu og fyrirtæki og félagasamtök hafa verið dugleg að styrkja starf samtakanna. Á dögunum styrkti Lionsklúbbur Akureyrar Aflið með peningagjöf að upphæð 150.000 kr. Hrafnhildur Gunnþórsdóttir veitti styrknum viðtöku fyrir hönd Aflsins og fór athöfnin fram í húsnæði Lionsklúbbsins.

Hrafnhildur Gunnþórsdóttir varaformaður Aflsins tekur við styrk frá Lionsklúbb Akureyrar. Með henni á myndinni er stjórn klúbbsins, frá vinstri: Sigurður Tryggvason ritari, Sigurður Halldórsson formaður, Eyjólfur Árnason gjaldkeri.

Aflið þakkar Lionsmönnum kærlega fyrir styrkinn og stuðninginn í gegnum árin.

Aflið á Bíladögum

Líkt og síðustu ár verður Aflið sýnilegt á Bíladögum og verðum við með gönguvaktir á stærstu viðburðum og í miðbænum.

Fréttatilkynning frá Akureyrarbæ:

 

Virðum réttinn til næðis og öryggis á Bíladögum

 

Fulltrúar frá Aflinu, Akureyrarstofu, Bílaklúbbi Akureyrar, framkvæmdamiðstöð Akureyrarbæjar, lögreglu og slökkviliði, funduðu í gærmorgun um Bíladaga 2017 sem nú standa yfir á Akureyri og lýkur formlega laugardaginn 17. júní. Fram kom í máli Einars Gunnlaugssonar formanns BA að vel hafi gengið fram að þessu, allt kapp sé lagt á að allir virði siðareglur Bíladaga og að tekið verði stíft á þeim brotum sem kunna að koma upp, líkt og gert var í fyrra. Þá gildi einu hvort brotin eigi sér stað utan eða innan aksturssvæðis BA. Aflið, samtök gegn kynferðis- og heimilisofbeldi, verða sýnileg á stærstu viðburðum og lögreglan fylgist vel með því að allt fari vel fram. Lögreglumenn á vakt verða á bæði merktum og ómerktum bílum. Starfsmenn framkvæmdamiðstöðvar bæjarins hafa komið upp hraðahindrunum víða um bæinn til að koma í veg fyrir spól og óvarlegan akstur sem er að sjálfsögðu bannaður eins og ávallt.

 

Eiríkur Björn Björgvinsson bæjarstjóri á Akureyri leggur ríka áherslu á að allt fari vel fram og segir að eftir að allir viðburðir hafi verið færðir upp á akstursíþróttasvæði BA hafi skapast meiri sátt í bænum um Bíladaga. „Ég er jákvæður gagnvart því að halda hátíð sem þessa innan bæjarmarkanna en ekki nema það sé í fullri sátt við bæjarbúa. Það verða allir að leggjast á eitt, sýna tillitssemi og virða rétt íbúa til öryggis og næðis,“ segir Eiríkur Björn.

 

Siðareglur Bíladaga:

 

  • Við göngum (keyrum) vel um bæinn okkar, jafnt gestir sem heimamenn
  • Virðum hámarkshraða í íbúðarhverfum sem og á vegum úti
  • Við spólum einungis á akstursíþróttasvæði Bílaklúbbs Akureyrar
  • Gestir Bíladaga eru jákvæðir og þar af leiðandi þrælskemmtilegir
  • Við berum virðingu fyrir náunganum og tökum höndum saman um að gera Bíladaga frábæra
  • Gestir Bíladaga ganga snyrtilega um umhverfi sitt
Meðfylgjandi mynd tók Ragnar Hólm að loknum samráðsfundi um Bíladaga sem haldinn var á aksturssvæði BA 14. júní.

Munum að koma vel fram hvort við annað og skemmta okkur fallega.

Aukaaðalfundur 29. maí

Stjórn Aflsins boðar til aukaaðalfundar mánudaginn 29. maí klukkan 17:00 í húsnæði samtakanna í Aðalstræti 14.

Dagskrá aukaaðalfundar:

  1. Fundur settur, kosning fundarstjóra og ritara
  2. Lagabreytingar
  3. Kosning stjórnar samkvæmt 8. gr. laga Aflsins

Tillögur að lagabreytingum verða kynntar og lagðar fyrir aukaaðalfund.

Aðalfundur Aflsins

Aðalfundur Aflsins – Samtaka gegn kynferðis- og heimilisofbeldi var haldinn í húsakynnum samtakanna í Aðalstræti 14 miðvikudaginn 10. maí. Á fundinum fóru fram venjulega aðalfundarstörf þar sem ársskýrsla samtakanna fyrir árið 2016 var kynnt og Níels Guðmundsson frá ENOR kom og fór yfir ársreikning síðasta rekstarárs. Fyrir fundinn voru lagðar lagabreytingar til umræðu og samþykktar og voru þær samþykktar einróma.

Kosið var til stjórnar og er ný stjórn þannig skipuð:
Formaður: Elín Björg Ragnarsdóttir
Aðrir stjórnarmenn:
Arnar Logi Björnsson
Hrafnhildur Gunnþórsdóttir
Tryggvi Hallgrímsson
Þórunn Anna Elíasdóttir
Varamenn:
Sigrún Finnsdóttir
Rósa Matthíasdóttir

Arnar Logi Björnsson er eini meðlimur nýrrar stjórnar sem einnig sat í síðustu stjórn en Sigrún Finnsdóttir sem var formaður síðustu stjórnar tekur sæti sem varamaður í nýrri stjórn.

Aflið vill þakka þeim Sóleyju Björk Stefánsdóttur, Kristínu Hebu Gísladóttur og Önnu Guðnýju Egilsdóttur kærlega fyrir óeigingjarnt og ómetanlegt starf í þágu samtakanna og við óskum þeim velfarnaðar í öllu sem þær taka sér fyrir hendur.

 

 

Aðalfundi Aflsins frestað til 10. maí

Vegna óviðráðanlegra orsaka hefur verið ákveðið að fresta aðalfundi um eina viku. Aðalfundur er nú boðaður miðvikudaginn 10. maí klukkan 17:00 í húsnæði samtakanna í Aðalstræti 14.

Dagskrá aðalfundar:

  1. Fundur settur, kosning fundarstjóra og ritara
  2. Ávarp formanns
  3. Ársskýrsla Aflsins kynnt og lögð fram til umræðu
  4. Ársreikningur Aflsins lagður fram til umræðu og samþykktar
  5. Fjárhagsáætlun yfirstandandi árs lögð fram til umræðu
  6. Lagabreytingar
  7. Ákvörðun árgjalda
  8. Ákvörðun launagreiðslna til stjórnar
  9. Kosning stjórnar samkvæmt 7. gr.
  10. Kosnir tveir skoðunnarmenn reikninga
  11. Önnur mál

Tillögur að lagabreytingum verða kynntar og ræddar og lagðar fyrir aðalfund.

Málþing um tengls kláms og ofbeldis

KLÁM OG OFBELDI

Aflið, samtök gegn kynferðis- og heimilisofbeldi, boða til málþings um tengsl kláms og ofbeldis föstudaginn 28. apríl frá kl. 16:00-18:00 í Hafnarvitanum, Strandgötu 16.

Dagskrá:

Kristín Heba Gísladóttir
Ávarp og kynning ársskýrslu f.h stjórnar Aflsins

Ólöf María Birnu Brynjarsdóttir, meistaranemi í félagsvísindum:
Ofbeldi og yfirvald, vangaveltur um ofbeldi og birtingarmyndir þess í nútíma samfélagi

Kolbrún Hrund Sigurgeirsdóttir, verkefnastýra jafnréttismála hjá skóla- og frístundasviði Reykjavíkurborgar: „Mér finnst það bara verða grófara og grófara“ Upplifun ungs fólks á kynlífi, klámi og ofbeldi.

Hildur Friðriksdóttir, meistaranemi í félagsvísindum: „Þú ert bara ráðin til að kyngja, kinka kolli á milli lappa og hlusta á mig syngja“ Hugleiðingar um klámvæðingu og afleiðingar hennar.

Fundarstjóri verður Pétur Guðjónsson, viðburðarstjóri VMA, leikstjóri, leikskáld og plötusnúður.

Allir velkomnir meðan húsrúm leyfir!

 

Máþing Aflsins um tengsl kláms og ofbeldis

Aðalfundur Aflsins 3. maí

Aflið – Samtök gegn kynferðis og heimilisofbeldi, boða til aðalfundar miðvikudaginn 3. maí klukkan 17:00 í húsnæði samtakanna í Aðalstræti 14.

Dagskrá aðalfundar:

  1. Fundur settur, kosning fundarstjóra og ritara
  2. Ávarp formanns
  3. Ársskýrsla Aflsins kynnt og lögð fram til umræðu
  4. Ársreikningur Aflsins lagður fram til umræðu og samþykktar
  5. Fjárhagsáætlun yfirstandandi árs lögð fram til umræðu
  6. Lagabreytingar
  7. Ákvörðun árgjalda
  8. Ákvörðun launagreiðslna til stjórnar
  9. Kosning stjórnar samkvæmt 7. gr.
  10. Kosnir tveir skoðunnarmenn reikninga
  11. Önnur mál

Tillögur að lagabreytingum verða ræddar og lagðar fram til samþykkis aðalfundar.

Hádegisfundur um líðan ungs fólks

Miðvikudagurinn 8. mars var alþjóðlegur barátturdagur kvenna. Af því tilefni boðaði Jafnréttisstofa í samstarfi við Zontaklúbbana á Akureyri til hádegisfundar í anddyri Borga við Norðurslóð og mættu fulltrúar Aflsins gallvaskir til fundar. Yfirskrift fundarins var „Líðan ungs fólks – Hvað er til ráða“. Frummælendur voru Ingibjörg Auðunsdóttir fyrrverandi sérfræðingur á Miðstöð skólaþróunar Háskólans á Akureyri, menntaskólakennarinn Arnar Már Arngrímsson handhafi verðlauna Norðurlandaráðs í barna- og unglingabókmenntum 2016 og Karólína Rós Ólafsdóttir nemandi við Menntaskólann á Akureyri og formaður FemMa Femínistafélags skólans.

Meðlimir í FemMA, femínistafélagi Menntaksólans á Akureyri, mættu á staðinn og seldu boli til styrktar Aflinu og kunnum við þeim miklar þakkir fyrir stuðninginn.

Lóa Aðalheiður Kristínardóttir og Dagný Guðmundsdóttir við söluborð FemMA
Myndina á bolunum hannaði Karólína Rós Ólafsdóttir formaður FemMA en hún var auk þess einn af frummælendum á fundinum.

Óhætt er að segja að hádegisfundurinn hafi vakið mikla athygli en tæplega tvöhundruð manns sóttu fundinn og var fullt út úr dyrum. Aflið þakkar Jafnréttisstofu og Zontaklúbbum Akureyrar fyrir vel heppnaðan hádegisfund og FemMA fyrir stuðninginn.